Ministria e Infrastrukturës dhe Transportit u ka bërë thirrje të gjithë ngasësve që të tregojnë kujdes të shtuar gjatë qarkullimit në rrugë, për shkak të punimeve për mirëmbajtjen e rrugëve në segmente të ndryshme.
Sipas Ministrisë, ekipet e mirëmbajtjes janë duke punuar në terren, ndërsa drejtuesit e automjeteve janë ftuar të respektojnë sinjalizimin e përkohshëm rrugor dhe të përshtatin shpejtësinë me kushtet në zonat ku po zhvillohen punimet.
Ministria ka kërkuar gjithashtu që ngasësit të ndjekin udhëzimet e punëtorëve në terren, me qëllim të rritjes së sigurisë për pjesëmarrësit në komunikacion dhe ekipet që po kryejnë punimet.
“Për sigurinë tuaj dhe të ekipeve që po punojnë, ju lutemi respektoni sinjalizimin e përkohshëm rrugor, ulni shpejtësinë dhe ndiqni udhëzimet e punëtorëve në terren”, thuhet në njoftimin e Ministrisë.
Në fund, Ministria ka apeluar te ngasësit që të jenë të vëmendshëm dhe të tregojnë durim gjatë kalimit në segmentet ku po zhvillohen punime.
