Ballkani do të debutojë sot në garat evropiane. Kampioni i kosovar do të luajë për herë të parë në Evropë pas suksesit që e arriti në edicionin e fundit në Superligë.
Therandasit do të nisin gjithçka nga rrethi i parë kualifikues i Ligës së Kampionëve. Ekipi nga Suhareka më saktësisht do ta presë skuadrën nga Lituania, Zalgiris Vilnius.
Skuadra mysafire është favorite për shkak të përvojës që e ka në garat evropiane. Lituanezët kanë mbërritur dje në Kosovë dhe janë të gatshëm për këtë sfidë, njëjtë si ekipi i trajnerit Daja.
Mirëpo, ekipi kosovar, i mbështetur nga tifozët, do të mundohet ta krijojë një kapital nga ndeshja e parë që do ta luajë në shtëpi, para asaj të kthimit, e cila do të zhvillohet pas një jave.
Ndeshja ndërmjet Ballkanit dhe Zalgirisit do të luhet sonte në stadiumin “Fadil Vokrri” në Prishtinë duke filluar nga ora 20:00.
