Profesori i ekonomisë, Shkumbin Misini, ka paralajmëruar se inflacioni në Kosovë pritet të vazhdojë edhe gjatë vitit 2026, si pasojë e rritjes së pritshme të disa parametrave ekonomikë, veçanërisht çmimit të energjisë elektrike.
Misini ka theksuar se çdo rritje e çmimit të energjisë elektrike reflektohet drejtpërdrejt në rritjen e kostos së jetesës për qytetarët, duke nënvizuar se qeveria e ardhshme duhet të ndërmarrë masa konkrete për të zbutur ndikimin e inflacionit.
“Në vitin 2026 pritet të ketë sërish inflacion, për shkak të disa parametrave për të cilët po diskutohet se do të rriten, siç është çmimi i energjisë, i cili në mënyrë automatike ndikon në rritjen e kostos së jetesës për qytetarët e Kosovës”, ka thënë ai në emisionin “Ditari” në Tëvë1.
Ai ka renditur tri masa kryesore për zbutjen e inflacionit: mosrritjen e çmimit të energjisë elektrike, mosrritjen e tatimit në pronë dhe orientimin e politikave ekonomike drejt investimeve kapitale dhe projekteve investuese që rrisin punësimin.
Sipas tij, qeveria e ardhshme duhet të përqendrohet në investime që krijojnë vende pune, pasi skemat sociale shpesh përdoren për qëllime politike, ndërsa investimet kapitale sjellin zhvillim ekonomik më të qëndrueshëm.
“Sa i përket masave që duhet të marrë qeveria e ardhshme, besoj se hapi i parë duhet të jetë mosrritja e çmimit të energjisë elektrike. Po ashtu, nuk duhet të rritet tatimi në pronë, ashtu siç parashikohet sipas ligjit të miratuar vitin e kaluar në Kuvendin e Kosovës, pasi kjo do ta rriste edhe më tej koston e jetesës. Faktori i tretë ku qeveria duhet të fokusohet është orientimi jo në skema sociale, por në investime në projekte kapitale dhe projekte investuese që rrisin punësimin, e jo në skema sociale që ndikojnë drejtpërdrejt në blerjen e votës,” ka theksuar Misini./teve1.info/
