Janë dy njerëzit më të fuqishëm brenda NATO-s.
E që të dy, të mërkurën para 20 mijë pjesëmarrësve, e përmendën Kosovën.
Këtë Donald Trump e Rexhep Taip Erdogan, e bën në samitin dy ditor të NATO-s në Hagë.
“Në javët e fundit ne u kujdesëm për Indinë dhe Pakistanin, Kosovën dhe Serbinë, Kongo po vjen, Rëanda po vjen. Kjo ishte një luftë e madhe. Kosova dhe Serbia, kanë luftuar për vite, dhe siç e dini, e sollëm edhe atë luftë në një përfundim”, tha Trump.
Për sigurinë e Kosovës foli edhe presidenti turk.
“KFOR-i Turk ndodhet në atë zonë, pse ndodhet aty? Për paqe, për qetësi dhe derisa KFOR-i Turk ndodhet aty, inshallah aty nuk mundet dhe nuk do ketë ndonjë problem”, tha ai.
E vëmendja e liderëve botëror ndaj Kosovës, është mirëpritur në vend.
Ish-kryeinspektori i AKI-së, Shkëlzen Sopjani, thotë se Donald Trump, ka aftësinë për ta zgjedhur çështjen mes Kosovës dhe Serbisë, në një periudhë afatgjate.
“Mendoj që kjo përmendje është një rikthim i lehtë i Kosovës në agjendën e Trump, edhe pse për momentin nuk pres që të ketë një rol të theksuar në agjendë, marrë parasysh krizat e tjera, Ukraina dhe Lindja e Mesme dhe pika e parë në agjendë të Trump është Kina, si kërcënimi më i madh për SHBA”, u shpreh Sopjani.
E në vjeshtë, komanda e KFOR-it në Kosovë, pritet të kthehet sërish në duart e turqve.
Për këtë sipas Sopjanit, zotimi i Erdoganit, është i mirëseardhur.
“Edhe Turqia e kthen komandën e KFOR-it në Kosovë, sepse mos të harrojmë, prej ushtrive me serioze në NATO, dhe me pak tolerante ndaj armiqësive qoftë drejtuar atyre, apo subjekteve që ata i garantojnë, janë ushtria amerikane, turke e britanike dhe kjo është parë në të gjitha misionet dhe historikisht është dëshmuar. Dhe mendoj që kthimi i komandës të KFOR-it në ushtrinë turke në Kosovë, është një garanci shtesë për potencial shumë më të ultë për ndonjë trazirë të mundshme në veri”, tha ai.
Se NATO do të jetë i fokusuar në rajon, e tha të mërkurën edhe sekretari i aleancës veri-atlantike, Mark Rutte.
