Kryeministri i Kosovës, Albin Kurti ka thënë se ky ligj ndër të tjera ka për qëllim që të përcaktojë parimet e sigurisë kibernetike si dhe masat për parandalimin e sulmeve kibernetike në vend.
“Ky ligj ka për qëllim që të përcaktojë parimet e sigurisë kibernetike, institucionet që i zhvillojnë dhe zbatojnë politikën e sigurisë kibernetike, përgjegjësit e autoriteteve në fushën e sigurisë kibernetike, detyrat e subjekteve, bashkëpunimin ndërinstitucional si dhe masat për parandalimin e sulmeve kibernetike në Republikën e Kosovës”, tha ai.
Kurti theksoi se me Projektligjin në fjalë do të themelohet Agjencia për Sigurinë Kibernetike, që sipas tij do të jetë institucioni kyç përgjegjës për caktimin dhe zbatimin e masave për sigurinë kibernetike në Kosovë.
“Përmes këtij projektligji themelohet Agjencia për Sigurinë Kibernetike që do të jetë institucioni kyç përgjegjës për caktimin dhje zbatimin e masave për sigurinë kibernetike në republikën tonë. Kjo agjenci do të kontribuojë në rritjen e kapaciteteve nacionale në fushën e sigurisë kibernetike. Agjencia do të ketë për detyrë të monitorojë, inspektojë dhe koordinojë aktivitetet e institucioneve përgjegjëse për sigurinë kibernetike si dhe të ndërmarrë masa në rast të moszbatimit të obligimit të parapara me këtë ligj”, deklaroi ai.
Sipas tij, detyrë me rëndësi e kësaj agjencie do të jetë reagimi ndaj kërcënimeve dhe incidenteve në hapësirën kibernetike të Republikës së Kosovës. /teve1.info/
