Qeveria e Kosovës ka miratuar pikën e parë të mbledhjes së sotme të Qeverisë, e cila ishte shqyrtimi i Propozim vendimit për aprovimin e kritereve, kushteve për shpalljen e konkursit si dhe procedurat e aplikimit të përzgjedhjes së Projektit për “Kompleksin Memorial Adem Jashari” në Prekaz.
Kryeministri Albin Kurti në fjalën e tij tha se Qeveria e ka trajtuar me prioritet Kompleksin Memorial në Prekaz, teksa tha se ky kompleks është pasqyrë e jona tek e cila e gjejmë lavdinë e djeshme dhe forcën e nesërme.
“Si Qeveri e kemi trajtuar me prioritet të lartë dhe kujdes të veçantë “Kompleksin Memorial Adem Jashari” në Prekaz që prej themelimit të komunitetit ndërministror vetëm një muaj pas themelimit të Qeverisë kemi ecur me hapa të sigurtë drejt mbrojtjes së vlerave dhe zhvillimit të masterplanit për kompleksin memorial. Vitin e kaluar jemi kujdesur që të konsulidohet gjendja fizike e ndërtesave në këtë kompleks, falë ndërhyrjeve emergjente gjendja e ndërtesave në këtë kompleks është përmirësuar. Kompleksi Memorial është pasqyrë e jona në të cilën e shohim veten tonë, përmes së cilës na shohin të tjerët. Aty e gjejmë lavdinë e djeshme forcën për nesër”, tha Kurti.
Teksa edhe ministri i Kulturës Hajrullah Çeku kërkoi aprovimin dhe miratimin e këtij propozimi për të vazhduar me shpalljen e konkursit ndërkombëtar
“Ministria e Kulturës në kordinim të ngushtë me agjensinë ka marrë hapat e nevojshëm për përgatitjen e procesit të shpalljes së konkursit me theks të veçantë në përcaktimin e kushteve dhe kritereve për shpalljen e këtij konkursi në përputhje me ligjin për Kompleksin Memorial, Ministria e Kulturës kanë propozuar kushtet dhe kriteret për shpalljen e konkursit”,tha ai./teve1.info./