Anëtarja e Komisionit për Buxhet, Arbërie Nagavci, ka njoftuar se është miratuar projektligji për ndryshimin e Ligjit për Parandalimin e Pastrimit të Parave dhe Luftimin e Financimit të Terrorizmit.
Përmes një postimi në Facebook, deputetja e Lëvizjes Vetëvendosje ka bërë të ditur se projektligji synon forcimin e masave për parandalimin e pastrimit të parave dhe luftimin e financimit të terrorizmit.
Sipas Nagavcit, ndryshimet e propozuara synojnë krijimin e rregullave dhe mekanizmave që ndihmojnë në identifikimin dhe parandalimin e aktiviteteve të paligjshme në sistemin financiar.
“Përmes rregullave dhe mekanizmave që ndihmojnë në identifikimin dhe parandalimin e aktiviteteve të paligjshme në sistemin financiar”, ka shkruar Nagavci, duke iu referuar qëllimit të projektligjit.
Ajo ka theksuar se mbetet e rëndësishme avancimi i legjislacionit dhe forcimi i institucioneve në funksion të sundimit të ligjit.
“Mbesim të angazhuar në avancimin e legjislacionit dhe forcimin e mekanizmave institucionalë që garantojnë sundimin e ligjit, transparencën dhe përgjegjshmërinë”, ka shkruar Nagavci.
Ndërkohë, gjatë mbledhjes së Komisionit për Buxhet, më herët gjatë ditës, pati kritika nga opozita lidhur me mungesën e ministrit të Financave, Hekuran Murati, si dhe mënyrën e procedimit të këtij projektligji.
