Ministria e Bujqësisë, Pylltarisë dhe Zhvillimit Rural ka miratuar Kornizat e Programit Vjetor për vitin 2026, një paketë financiare prej mbi 77 milionë euro që synon zhvillimin dhe transformimin e sektorit të bujqësisë në Kosovë.
Vendimi është nënshkruar nga ministri Armend Muja, i cili theksoi se programi përcakton drejtimet kryesore strategjike dhe mbështetjen për fermerët, duke lidhur subvencionet direkte me investimet zhvillimore dhe stabilitetin e tregut.
Buxheti total prej rreth 77.5 milionë euro është ndarë në tre komponentë.
“Pjesa më e madhe, mbi 59 milionë euro, do të dedikohet për pagesa direkte për fermerët, duke përfshirë subvencionet për sipërfaqe bujqësore, mbështetje për sektorë të ndryshëm si blegtoria, bujqësia, pemëtaria dhe eko-skema për praktika të qëndrueshme”, thuhet në njoftim.
Ndërkohë, 10 milionë euro janë paraparë për Programin e Zhvillimit Rural, që synon modernizimin e fermave, rritjen e kapaciteteve përpunuese, mbështetjen e fermerëve të rinj dhe përmirësimin e infrastrukturës rurale.
Po ashtu, mbi 8 milionë euro janë ndarë për masa të stabilizimit të tregut, përfshirë mbështetjen për inpute bujqësore, kompensimet për dëme dhe ndërhyrjet për kontrollin e çmimeve në sektorë të ndjeshëm.
Sipas ministrit Muja, ky program nuk fokusohet vetëm në subvencione, por synon një qasje më të gjerë zhvillimore dhe transformuese të bujqësisë në vend.
“Kjo është një ndërhyrje e menduar për të mbështetur fermerët dhe për të ndërtuar një sektor modern dhe konkurrues në të ardhmen”, ka deklaruar ai.
