Mes kritikave të opozitës është miratuar marrëveshja ndërkombëtare për reformë në skemat sociale në Komisionin për Buxhet, Punë dhe Transfere.
Komisioni për Buxhet, Punë dhe Transfere ka miratuar marrëveshjen ndërkombëtare për reformë në skemat sociale.
Kjo marrëveshje ngjalli debate të shumta në komision, ndërsa që opozita dha kritika të shumta.
Gjatë raportimit të ministrit të Financave, Hekuran Murati, nënkryetari i këtij Komisioni, Mërgim Lushtaku ka kërkuar reflektim nga qeveria për të tejkaluar siç tha ai këtë ngërç edhe në seancë plenare.
“Ne do të abstenojmë për këtë marrëveshje. Kam pritur reflektim për këtë, pasi që është hera e tretë që po shqyrtohet pa asnjë ndryshim”, theksoi ai.
Edhe dy deputetët nga pozita, Visar Korenica dhe Eman Rrahmani kanë kërkuar reflektim nga Ministria e Financave, veçanërisht për 15 milionë eurot të kësaj kredie.
Ministri Murati u pajtua me propozimin e bashkëpartiakëve të tij, por deputeti Avdullah Hoti tha se është i vonshëm ridizajnimi i kësaj marrëveshje, pasi që është e nënshkruar tashmë.
“Ua ka lënë në dorë këtë marrëveshje Banka Botërore. Ishte dashur atëherë me kërku ridizajnim. Tash është vonë”, tha ai.
Sipas deklarimeve të mëhershme të ministrit të Punës, Financave dhe Transfereve, Hekuran Murati, projekti i reformës sociale do të mundësohet me kredinë prej 47 milionë eurosh nga Banka Botërore dhe do të zgjerojë bazën e asistencës sociale, në raport edhe me nevojat e qytetarëve.
Murati, po ashtu, ka thënë se ky projekt do të krijojë mekanizma që i ndihmojnë familjet në nevojë të dalin nga varfëria, duke u siguruar atyre ndërlidhje me tregun e punës.
Ndërsa, shqyrtimi i Raportit Vjetor Financiar për Buxhetin e Republikës së Kosovës për vitin 2021 është shtyrë për javën tjetër.
Po ashtu edhe Raporti Vjetor për Fondin e Kursimeve Pensionale për vitin 2021 është shtyrë sërish për javën e ardhshme.
Ndërsa, me shumicë votash Komisioni miratoi Raportin Vjetor Financiar të Institucionit të Avokatit të Popullit për vitin 2021./Ksp/
