Kuvendi Komunal i Prishtinës, në një seancë të jashtëzakonshme, ka miratuar buxhetin e kryeqytetit për vitin 2026.
Buxheti është miratuar me 33 vota për, 8 vota kundër, ndërsa nuk ka pasur asnjë abstenim.
Ai u mbështet nga Lidhja Demokratike e Kosovës dhe Partia Demokratike e Kosovës, ndërsa Lëvizja Vetëvendosje ishte shprehur paraprakisht se nuk do ta votonte.
Në këtë seancë të jashtëzakonshme nuk ishte i pranishëm kryetari i Komunës, Përparim Rama, i cili ka njoftuar se ndodhet në Shtetet e Bashkuara të Amerikës për një vizitë zyrtare.
Buxheti i paraparë për Komunën e Prishtinës për vitin 2026 kap vlerën e mbi 151 milionë euro.
Ndryshe, në fillim të seancës, drejtoresha për Financa, Valbona Makolli, prezantoi strukturën e buxhetit, e cila është e ndarë në pesë kategori kryesore shpenzimesh.
Sipas prezantimit, kategoria e pagave dhe mëditjeve për vitin fiskal 2026 kap vlerën prej 48.3 milionë euro.
Për mallra dhe shërbime janë ndarë 32 milionë euro, ndërsa shpenzimet komunale arrijnë në 3.5 milionë euro.
Subvencionet dhe transferet janë planifikuar në vlerë prej 6.8 milionë euro, ndërkohë që investimet kapitale kapin shumën më të madhe, prej 60.8 milionë euro.
Pas prezantimit të buxhetit, Makolli kërkoi miratimin e tij nga përfaqësuesit e partive politike./teve1.info/
