Ministria e Industrisë, Ndërmarrësisë, Tregtisë dhe Inovacionit (MINTI) ka njoftuar se ka shqiptuar gjobë në vlerë prej 30 mijë euro ndaj KEDS-it, pas konstatimit të gjashtë njehsorëve elektrikë me afat të skaduar të verifikimit.
Sipas MINTI-t, ky veprim është ndërmarrë në kuadër të aktiviteteve të vazhdueshme të verifikimit të njehsorëve elektrikë në të gjithë territorin e Kosovës.
“Komisioni Verifikues po vazhdon punën në terren në shtatë regjionet e vendit, me qëllim të identifikimit dhe adresimit të çdo parregullsie”, thuhet në njoftim.
Rezultatet e deritanishme nga analizat laboratorike të kryera në Agjencinë e Metrologjisë së Kosovës kanë evidentuar pasaktësi në regjistrimin e orës dhe datës në disa prej njehsorëve të testuar.
Në këtë drejtim, MINTI i ka dorëzuar kërkesë zyrtare KESCO-s për kompensimin e konsumatorëve të dëmtuar dhe ka bërë të ditur se do të vazhdojë të publikojë raporte ditore si dëshmi mbështetëse për procesin.
Po ashtu, Komisioni Verifikues është në bashkëpunim me Prokurorinë dhe organet e hetuesisë për trajtimin e mëtejmë të rastit.
“MINTI mbetet e përkushtuar për transparencë të plotë dhe do të informojë qytetarët në baza të rregullta për çdo zhvillim, në funksion të mbrojtjes së konsumatorit”, thuhet në fund të njoftimit./teve1.info./
