Ministria e Industrisë, Ndërmarrësisë dhe Tregtisë, ka thënë se vendimi i shkallës së parë për rastin e Klan Kosovës ka qenë i drejtë.
Përmes një komunikate për media kjo ministri, thuhet se Komisioni për Shqyrtimin e Ankesave për Regjistrimin e Bizneseve, ka sigurua dokumentacionin aktual nga institucionet e Maqedonisë së Veriut për “Pronarët e Vërtetë të Subjektit”, ku Kosova paraqitet pjesë e Serbisë.
Sipas ministrisë në bazë të këtij dokumenti është refuzuar edhe ankesa e parashtruar nga pala tjetër.
“Komisioni për Shqyrtimin e Ankesave për Regjistrimin e Bizneseve, pas verifikimit të të gjithë dokumentacionit në dispozicion për Klan Kosovën Sh.P.K., ka konstatuar se vendimi i shkallës së parë ishte i drejtë dhe në përputhje të plotë me ligjet në fuqi në Republikën e Kosovës. Kjo, pasi që Komisioni ka siguruar dokumentacionin aktual nga institucioni përkatës në Maqedoninë e Veriut, për “Pronarët e Vërtetë të Subjektit”, në të cilin dokumentacion ka gjetur se Kosova paraqitet përsëri si pjesë e Serbisë. Në bazë të këtij dokumentacioni, i cili gjendet më poshtë (shih f. 1 dhe 3), Komisioni ka refuzuar ankesën e parashtruar nga pala në procedurë, duke konfirmuar të njëjtën shkelje të Kushtetutës që e ka konstatuar ARBK në shkallën e parë”, thuhet në komunikatë.
Ministria ka potencuar se çdo palë në procedurë gëzon të drejtën e ankimimit ndaj vendimeve të ARBK-së. Mirëpo, shkeljet e Kushtetutës nuk mund të konsiderohen kurrë si çështje “teknike”.
Klan Kosovës i është pezulluar licenca. Për këtë rast sot do të protestohet në Prishtinë, në protestën e thirrur nga Asociacioni i Gazetarëve të Kosovës./teve1.info/
