Ministrja në detyrë e Tregtisë dhe Industrisë, Rozeta Hajdari, është paraqitur sot për t’u intervistuar nga Prokuroria Speciale e Kosovës, në kuadër të hetimeve që lidhen me keqpërdorimin e rezervës shtetërore.
Hajdari ka hyrë në ambientet e Prokurorisë rreth orës 10:00, ndërsa intervistimi i saj ka zgjatur më shumë se një orë. Kjo është hera e dytë që ministrja intervistohet për këtë çështje – hera e parë ishte në prill të vitit 2024, kur ajo u thirr si e dyshuar për keqpërdorim të detyrës zyrtare.
Skandali për keqpërdorimin e rezervave shtetërore u bë publik në gusht të vitit 2023, duke u shndërruar në një nga aferat më të përfolura të asaj periudhe. Si rezultat, disa persona përfunduan në paraburgim, përfshirë zyrtarë të Ministrisë së Tregtisë dhe Industrisë, që aso kohe udhëhiqej nga Hajdari.
Prokuroria Speciale po vazhdon hetimet për të zbardhur përgjegjësinë penale të zyrtarëve të përfshirë, përfshirë edhe rolin eventual të ministres në detyrë.
Nuk ka ende ndonjë informacion zyrtar nga Prokuroria lidhur me statusin e saj në këtë rast, ndërsa mbetet të shihet nëse do të ngritet aktakuzë apo nëse ajo do të lirohet nga çdo përgjegjësi penale.
