Konfiskimi i pasurisë pa dënim penal (non-conviction based confiscation) dhe roli i ardhshëm i Byrosë Shtetërore për Verifikimin dhe Konfiskimin e Pasurisë së Pajustifikueshme kanë qenë në fokus të një takimi ndërmjet përfaqësuesve të Ministrisë së Drejtësisë dhe zyrtarëve nga Mbretëria e Bashkuar.
Në takim morën pjesë Sekretari i Përgjithshëm i Ministrisë së Drejtësisë, Ridvan Hoti, dhe Drejtori i Departamentit Ligjor, Lulzim Beqiri.
Nga pala britanike ishin të pranishëm Jaz Craston, Koordinatore për Krimin e Rëndë dhe të Organizuar, Christopher Toyn, përfaqësues për çështjet e financave të paligjshme dhe kundër korrupsionit për vendet e rajonit, si dhe Altina Besimi, Zyrtare për Zbatimin e Politikave në Ambasadën Britanike në Prishtinë.
Sipas njoftimit zyrtar, përfaqësuesit e Ministrisë së Drejtësisë prezantuan zhvillimet në kuadrin ligjor në këtë fushë, përfshirë procesin e hartimit të projektligjit përkatës dhe çështjet që lidhen me funksionalizimin e ardhshëm të Byrosë.
Gjatë takimit u diskutua veçanërisht raporti ndërmjet konfiskimit civil dhe procedurave penale, roli i gjykatave në vendimmarrjen për konfiskim dhe standardi i provës.
Po ashtu, u trajtuan çështje që lidhen me bashkëpunimin ndërinstitucional, hetimet financiare dhe gjurmimin e pasurisë.
Palët shkëmbyen pikëpamje edhe për përvojën e Mbretërisë së Bashkuar në fushën e konfiskimit të pasurisë pa dënim penal, si dhe për mundësitë e bashkëpunimit dhe mbështetjes së mëtejshme profesionale në procesin e funksionalizimit të këtij mekanizmi në Kosovë.
Takimi vjen në kuadër të diskutimeve për zhvillimin e mekanizmave ligjorë dhe institucionalë për verifikimin dhe konfiskimin e pasurisë së pajustifikueshme.
