Izraeli nuk është pjesë e negociatave mes SHBA-së dhe Iranit dhe do të vazhdojë ofensivën në Liban derisa Hezbollah të “shkatërrohet plotësisht”, deklaroi ministri izraelit i Financave, Bezalel Smotrich.
“Izraeli nuk është pjesë e bisedimeve negociuese me Iranin me zgjedhjen tonë”, tha ai, duke shtuar: “Ne nuk do të zhvillojmë bisedime me djallin.”
“Ne nuk jemi palë në negociatat mes Shteteve të Bashkuara dhe Iranit, dhe ato nuk na interesojnë aspak”, tha në një intervistë për Radion e Ushtrisë Izraelite, të cituar nga agjencia Anadolu.
Duke folur për Libanin, ai tha: “Ne do të vazhdojmë të veprojmë plotësisht në Liban.”
“Ushtria izraelite nuk do të tërhiqet nga zona e sigurisë në Liban, përfshirë Kalanë Beaufort, për sa kohë që ekziston Hezbollah”, shtoi ai.
“Ne nuk do të tërhiqemi jo vetëm derisa Hezbollah të heqë dorë nga armët e tij, por derisa të shkatërrohet plotësisht.”
Komentet e tij vijnë mes shqetësimeve në Izrael se një marrëveshje mes SHBA-së dhe Iranit mund të forcojë Teheranin dhe aleatët e tij në rajon.
