Ministri i Mbrojtjes i Izraelit, Israel Katz, ka kërcënuar përsëri se do të vrasë udhëheqësin suprem iranian, Ajatollah Ali Khamenei, gjatë një vizite në bazën ajrore Ramon të Forcave Ajrore të Izraelit të dielën.
“Dua t’i dërgoj një mesazh të qartë diktatorit Khamenei: Nëse vazhdoni të kërcënoni Izraelin, krahu ynë i gjatë do të arrijë përsëri Iranin, me forcë edhe më të madhe, dhe këtë herë, do t’ju arrijë personalisht”, tha Katz.
Kjo ndodhi gjatë një fjalimi ku vlerësoheshin ekuipazhet e avionëve luftarakë në Bazën Ajrore Ramon. I pranishëm ishte edhe kryeministri Benjamin Netanyahu, ka shkruar The Jerusalem Post.
“Faleminderit për punën e jashtëzakonshme që bëtë në Operacionin Rising Lion, kur hapët qiellin drejt Teheranit, goditët vazhdimisht në krye të oktapodit iranian dhe larguat kërcënimet e asgjësimit”, deklaroi Katz.
Katz edhe më herët kishte kërcënuar drejtpërdrejt me jetë Khamenein, duke e paralajmëruar se mund të përfundonte si ish-presidenti i vrarë irakian, Saddam Hussein./teve1/
