Politikani rus, Roman Starovoyt është gjetur i vdekur me plagë të shkaktuara nga arma e zjarrit në rajonin e Moskës, konfirmoi të enjten Komiteti Hetimor Rus, disa orë pasi ai u shkarkua nga detyra e ministrit të Transportit të vendit.
Zëdhënësja e Komitetit, Svetlana Petrenko, tha se po zhvillohet një hetim për të përcaktuar rrethanat e vdekjes së ish-ministrit.
Petrenko tha në Telegram se Starovoyt u gjet i vdekur në makinën e tij me plagë nga një armë zjarri.
“Versioni kryesor është vetëvrasja,” shtoi ajo, raporton Anadoly.
Duke cituar shërbimet e emergjencës, mediat shtetërore ruse, përfshirë agjencinë e lajmeve RIA, raportuan më parë se Starovoyt kreu vetëvrasje në qytetin Odintsovo në rajonin e Moskës.
Më herët gjatë ditës, Presidenti rus Vladimir Putin nënshkroi një dekret që shkarkonte Starovoyt, i cili u emërua në këtë post në maj 2024, pasi shërbeu si guvernator i rajonit kufitar rus të Kurskut që nga shtatori 2019.
Putini më vonë nënshkroi një dekret tjetër duke emëruar zëvendësin e tij, Andrey Nikitin, si ministër të përkohshëm të transportit të vendit.
