Ministri izraelit i Mbrojtjes, Israel Katz, bëri një kërcënim të drejtpërdrejtë ndaj udhëheqësit suprem të Iranit, Ajatollah Ali Khamenei, të enjten, duke thënë se ai “nuk duhet të ekzistojë”.
“Nuk ka vend në këtë botë për një person të tillë,” tha Katz, sipas deklaratave të publikuara nga gazeta izraelite Yedioth Ahronoth.
Kërcënimi vjen në përgjigje të një vale të re sulmesh me raketa nga Irani, ku rreth 20-30 raketa goditën qytete qendrore izraelite, përfshirë Tel Avivin, Ramat Ganit dhe Holonin si dhe spitalin Soroka në qytetin jugor të Beershebës.
Autoritetet izraelite raportuan se më shumë se 80 persona u plagosën nga sulmet.
Agjencia shtetërore e lajmeve iraniane, IRNA, deklaroi se raketat kishin në shënjestër selinë e ushtrisë dhe të shërbimit të inteligjencës izraelite pranë Spitalit Soroka, duke pretenduar se vala e shpërthimit shkaktoi dëme dhe lëndime në zonë.
