Ministri i Jashtëm turk, Hakan Fidan, tha se Egjipti pritet t’i bashkohet marrëveshjes së fundit të mbrojtjes të nënshkruar nga Turqia, Arabia Saudite dhe Pakistani në fazën tjetër.
Kjo sipas tij pritet të ndodh pasi të zgjidhen disa çështje teknike, duke e përshkruar Kajron si një “partner natyror” dhe duke theksuar rëndësinë e platformës rajonale të katër vendeve.
“Egjipti është tashmë partneri ynë natyror në të gjitha çështjet. Unë besoj se në fazën tjetër, Egjipti do të jetë gjithashtu midis nesh në aleancë. Ne tashmë sillemi ndaj njëri-tjetrit sikur të ishim anëtarë të aleancës. Ka disa çështje teknike. Pasi këto të zbatohen, nuk ka asnjë arsye që Egjipti të mos jetë pjesë e saj”, tha Fidan në programin e Redaktorëve të Anadolu-s të shtunën.
Ai tha se platforma rajonale e katër vendeve që përfshin Egjiptin do të mbetet një platformë shumë e rëndësishme politike.
Fidan theksoi se kuarteti rajonal do të ruante rëndësinë e tij dhe tha se as Pakistani dhe as Arabia Saudite nuk kishin ndonjë mosmarrëveshje në lidhje me rëndësinë e Egjiptit.
