Ministri i Sigurisë së Bosnjës dhe Hercegovinës Nenad Neshiq, i pyetur nëse Kosova është e ftuar në Konferencën për Migrimin e cila do të mbahet në fillim të qershorit afër Sarajevës, theksoi se ministria e linjës së Kosovës do të ftohet “me fusnotë”.
Ai deklaroi se ftesa për pjesëmarrje do të jetë e kushtëzuar.
“Në përputhje me mënyrën se si ata zakonisht marrin pjesë në konferenca ndërkombëtare, ose për të përkthyer në gjuhën tonë, me një fusnotë”, tha Neshiq për REL.
Në Bruksel në vitin 2012 është arritur një marrëveshje ndërmjet Prishtinës dhe Beogradit për përfaqësimin rajonal të Kosovës, sipas së cilës emri i Kosovës përdoret me fusnotë. Disa nga vendet që nuk e kanë njohur Kosovën kanë vënë një yll pranë emrit të Kosovës
Bosnja dhe Hercegovina, për shkak të kundërshtimit të Republika Srpska, nuk e njeh Kosovën, shkruan kosovo-online, përcjell teve1.info.
Siç tha Neshiq, ministria e drejtuar nga ai do të ketë listën përfundimtare të të ftuarve në ditët në vijim. Në konferencë, përfaqësues të Organizatës Ndërkombëtare për Migrim nga vendet e rajonit do të diskutojnë për këtë çështje me përfaqësues të institucioneve kompetente.
Në pyetjen se pse Bosnja dhe Hercegovina nuk e ka ratifikuar ende Marrëveshjen për Lirinë e Lëvizjes me Kartë Identifikimi në Ballkanin Perëndimor, e cila u nënshkrua vitin e kaluar në Berlin nga kryetari i atëhershëm i Këshillit të Ministrave të Bosnje dhe Hercegovinës, Zoran Tegeltija, Neshiq u përgjigj se beson se ajo çështje do të zgjidhet së shpejti.