“Sipas informatave që na kanë dhanë, kanë thanë se është bë gjysma e pagës dmth për muajin shkurt, por ne secili, të gjithë që jemi këtu, asnjë s’kemi pranu as gjysmën e pagës edhe mas kësaj kanë thanë që javën e ardhshme pritet edhe një 30 % por ne s’kemi pranu asnjë për qind të pagës deri më sot”, thotë Ali Peci, minator në minierën “Trepça”.
“Nuk na kanë pagu muajin shkurt. S’na kanë dhanë pagën fare. Tash do banka tjera po thonë që i kanë qit një përqindje mirëpo te shumica jonë, ne që jemi në horizontin 10 nuk kemi asnjë cent. Ne prej mëngjesit jemi këtu dhe nuk ka ardhë kurrkush me fol me neve”, thotë minatori Fisnik Hoti.
E kryetari i sindikatës së këtyre punëtore, Gani Osmani tregoi pse atyre iu vonuan pagat.
“Na kemi bisedu edhe me drejtorin e me do na kanë thanë që arsyeja është se nuk janë qit mjetet, dmth mjetet të cilat e kem shit koncentratin. Ajo kompania e cila e ka ble na i ka vonu”, është shprehur kryetari i Sindikatës së punëtorëve të Trepçës, Gani Osmani.
Megjithatë, grevën të cilën e nisën ndërrimi i parë i punëtorëve, nuk e vazhduan ndrrimi i dytë.
Kjo pasi të enjten atyre iu ishte thënë se pagat do të ekzekutoheshin tërësisht deri të martën.
“Sipas kujdestarit të ndërrimit të parë që bisedum edhe me të, drejtori ka qenë pramë. Drejtori Nexhat Dedia edhe i ka siguru që pagat të martën kanë me dalë komplet. Për qat arsye une shkova, bisedova me punëtorë e mbikëqyrsa edhe vendosëm me shku deri të martën në punë”, tha kujdestari i minatorëve të Trepçës, Sadik Aliu.
Minatorët në Kosovë janë ballafaquar jo rrallë me vonesa të pagave. Ndryshe, Qeveria në muajin e kaluar ka emëruar edhe bordin mbikëqyrës të Trepçës.
Storja e përgatitur nga gazetari Gojart Jashari.
