I pyetur se a është e mundur të ketë një lloj kundër-rezolute që do të demantonte raportin e Dick Martyt, Milo thotë se nuk ka ndodhur asnjëherë në praktikën e Asamblesë Parlamentare të Këshillit të Evropës që një rezolutë e miratuar e votuar në kohë të shkuara të mund të anulohet me një rezolutë të më vonshme ose të kundërshtohet.
“Me sa jam unë në dijeni dhe të paktën në ato vite që unë kam marrë pjesë në Asamblenë Parlamentare të Këshillit Evropës nuk ka ndodhur asnjëherë që një rezolutë e miratuar e votuar në kohë të shkuara të mund të anulohet me një rezolutë të mëvonshme ose të kundërshtohet, nuk ka ndodhur në praktikën e Asamblesë Parlamentare të Këshillit të Evropës. Kështu që besoj që nuk do të ndodhë as tani”, tha Milo.
Më tej në intervistën e tij në emisionin “ResPublika” në Tëvë1, Milo duke komentuar fjalimin e Edi Ramës në Asamblenë e Këshillit të Evropës, tha se vlera e kryeministrit shqiptar qëndron në faktin se ai ka paraqitur argumentet për të vërtetuar falsitetin e akuzave të Dick Martyt në raport me Shqipërinë dhe UÇK-në.
“Vlera e paraqitjes së kryeministrit shqiptar në tribunën e Asamblesë Parlamentare të Këshillit të Evropës qëndron në argumentet që ai paraqiti për të vërtetuar falsitetin e akuzave të Dick Martyt në raport edhe me Shqipërinë, në raport edhe me udhëheqësit Ushtrisë Çlirimtare të Kosovës, kjo është vlera ky është kontributi të tjerat pastaj janë pjesë e polemikës publike midis aktorëve politik në Kosovë dhe në Shqipëri”, tha Milo.
“Raporti i Dick Martyt”, pretendonte se në Kosovë ka pasur krime të luftës që përfshijnë edhe trafikimin e organeve, gjë në të cilën edhe Gjykata Speciale është bazuar shumë gjatë themelimit të Dhomave të Specializuara./Teve1.info/