Milan – Bologna, është finalja e Kupës së Italisë, që zhvillohet sot prej orës 21:00 në stadiumin “Olimpico” të Romës.
Të dyja skuadrat e synojnë këtë trofe pas një kohe të gjatë dhe pritet të jetë një ndeshje e fortë dhe tejet interesante.
Milani ka triumfuar pesë herë në këtë garë, ndërsa për herë të fundit e ka fituar në vitin 2003.
Ndërkohë, Bologna po e kërkon për herë të tretë këtë trofe, të cilin për herën e fundit e ka fituar në vitin 1974.
Për dallim prej Bolognas, skuadra e Milanit këtë sezon tashmë e ka fituar një trofe, atë të Superkupës së Italisë.
Po ashtu, si Bologna ashtu edhe Milani në kampionat nuk kanë pasur rezultate stabile dhe suksesin në Kupën e Italisë e shohin si biletë për të siguruar daljen në garat e UEFA-s.
Në Serie A kur kanë mbetur edhe dy xhiro deri në fund të sezonit, Bologna është e shtata në tabelë me 62 pikë, dy më shumë se Milani që zë vendin e tetë.
