Presidentja e Kosovës, Vjosa Osmani, gjatë qëndrimit të saj në New York, ka zhvilluar një takim me kongresistin amerikan Keith Self, i cili është njëherësh Kryesues i Nënkomitetit për Evropën i Komisionit të Punëve të Jashtme të Dhomës së Përfaqësuesve.
Lajmin e ka bërë të ditur vetë presidentja në Facebook, ku ka vlerësuar mbështetjen e vazhdueshme të kongresistit ndaj Kosovës.
“Gjatë qëndrimit në New York, pata kënaqësinë ta takoj mikun e Kosovës, Kongresistin Keith Self, Kryesues i Nënkomitetit për Evropën i Komisionit të Punëve të Jashtme të Dhomës së Përfaqësuesve,” ka shkruar Osmani.
Në postimin e saj tha se “gjithnjë falënderues për mbështetjen e tij të pakursyer për Kosovën dhe popullin tonë”.
