Moti me shi nuk i ndali mijëra qytetarë t’u drejtohen varrezave në qytetin e Pejës, atje ku ju dha lamtumira e fundit 43-vjeçares Gjyljeta Ukella.
Familjarët me lot në sy i vendosen kurorat pranë varrit të saj.
Këtë ditë lotët nuk mund t’i ndalnin as qytetarët që morën pjesë në varrim.
Pas ceremonisë së varrimit, vëllai i Gjyljetës, Shpat Ukella tha se si familje nuk dinë asgjë më shumë për rastin.
Ukella uron që raste si të motrës së tij të mos përsëriten asnjëherë në vend.
“Falënderoj Zotin për krejt këta njerëz që kanë ardhë me na nderu dhe me na respektu në këto ditë të vështira për neve. Për neve rasti është shumë i rëndë. Uroj që organet e drejtësisë sa më shpejtë ta bëjnë zbardhjen dhe ta kryejnë punën e tyre dhe uroj që asnjëherë të mos ndodhin këso raste në qytetin tonë dhe sidomos në shtetin e as në kombin tonë të Kosovës dhe Shqipërisë e më gjerë”, deklaroi ai.
Përveç familjarëve, prezent në këtë ceremoni varrimi nga Qeveria e Kosovës ishte vetëm ministrja Rozeta Hajdari, i pari i Komunës së Pejës, Gazmend Muhaxhiri, shokët e shkollës te vajzave të Gjyljetës, kolegët e punës së saj si dhe shumë qytetarë nga mbarë Kosova.
Gjyljeta Ukella u vra të martën nga bashkëshorti i saj, Edmond Lajqi.
