Në konferencën ministrore “Menaxhimi i qëndrueshëm i migrimit në Ballkanin Perëndimor”, Sveçla tha se Republika e Kosovës e ka si synim menaxhimin e migracionit të rregullt, garantimin e migrimit të sigurt dhe mirë të organizuar si dhe fuqizimin e masave për të luftuar dhe parandaluar migrimin e parregullt.
Sipas një komunikate për medie të lëshuar nga MPB, Sveçla i prezantoi rezultatet e arritura në luftimin e kontrabandës me migrantë.
“Këtë vit Policia e Kosovës ka inicuar 32 raste të kontrabandës me migrantë, ka arrestuar 60 persona dhe ka identifikuar 332 viktima të kontrabandimit të emigrantëve. Gjatë të njëjtës periudhë Policia e Kosovës ka shkatërruar 4 grupe kriminale dhe ka arrestuar 28 persona për kontrabandim me migrantë”, tha Sveçla.
Sipas komunikatës, ai e theksoi nevojën për t’iu përgjigjur situatave të reja të krijuara si rezultat i luftës së Rusisë kundër Ukrainës.
“E cila ka ndikuar edhe në rritjen e flukseve të migrimit, kryesisht gra dhe fëmijë e ku deri më tani rreth 5 milionë refugjatë janë regjistruar në BE dhe më gjërë, dhe ka shprehur edhe njëherë gatishmërinë e Qeverisë që të strehojmë deri 5000 refugjatë si dhe kontributin që si Kosovë kemi dhënë në mbrojtje të gazetarëve ukrainas, ku tashmë 11 prej tyre jetojnë dhe punojnë në Kosovë”, thuhet në komunikatë.
Sveçla theksoi angazhimin e Qeverisë për të punuar së bashku për të forcuar bashkëpunimin midis vendeve të Ballkanit Perëndimor, BE-së dhe më gjerë, në mënyrë që t’i përgjigjet të gjitha sfidave, si dhe të garantoj sigurinë dhe mbrojtjen e vlerave evropiane dhe të demokracisë.
