Shefi i Misionit të Republikës së Kosovës në Selinë e Shenjtë, Vehbi Miftari, ka bërë të ditur se ka përfunduar mandatin e tij diplomatik në Vatikan, pasi është liruar nga detyra me dekret të ushtrueses së detyrës së presidentes, Albulena Haxhiu.
Në njoftimin e tij, Miftari theksoi se ky vendim shënon fundin e një angazhimi dyvjeçar në shërbimin diplomatik, të cilin e përshkroi si një përvojë të rëndësishme dhe sfiduese. Ai e vlerësoi këtë rol si një nder të veçantë, duke qenë përfaqësuesi i parë i Kosovës në këtë mision të posaçëm pranë Selisë së Shenjtë.
Sipas tij, gjatë kësaj periudhe janë avancuar raportet mes Kosovës dhe Vatikanit, çka e konsideron një sukses të rëndësishëm në planin diplomatik. Ai shprehu mirënjohje për ish-presidenten Vjosa Osmani për besimin e dhënë, si dhe për partnerët ndërkombëtarë për bashkëpunimin e vazhdueshëm.
Po ashtu, ai theksoi se mbetet i përkushtuar ndaj shtetit të Kosovës edhe pas përfundimit të këtij misioni diplomatik./teve1.info/
