Microsoft ka bërë të ditur se do të ndalojë së sugjeruari përdoruesve të Windows në Evropë që të kalojnë në shfletuesin Edge, si pjesë e përputhjes me Aktin e Tregjeve Digjitale të Bashkimit Evropian (DMA).
Ndryshimet do të zbatohen për përdoruesit në Zonën Ekonomike Evropiane dhe do t’u japin atyre mundësinë të çinstalojnë Microsoft Edge dhe Microsoft Store, si dhe të shmangin njoftimet për vendosjen e Edge si shfletues parazgjedhur.
Përveç kësaj, kur përdoruesit zgjedhin një shfletues tjetër si Chrome apo Firefox, ai do të vendoset automatikisht në shiritin e detyrave dhe do të lidhet me më shumë lloje skedarësh.
Edhe pas çinstalimit të Store, aplikacionet do të vazhdojnë të marrin përditësime dhe platforma mund të riinstalohet në çdo kohë. Gjithashtu, aplikacionet e palëve të treta do të mund të integrohen me Windows Search, ndërsa përdoruesit do të kenë liri të plotë për të zgjedhur ofruesin e kërkimit.
Përditësimet nisin në qershor dhe do të jenë të disponueshme gjerësisht në Windows 10 dhe 11 nga korriku.
