Mosha nuk përbën problem për Mihrije Daçaj që nga Prizreni të vijë në Prishtinë.
E gjithë kjo në betejën ligjore në zbardhjen e rastit të vrasjes së dy djemve të saj binjakë, gjatë luftës në Kosovë.
“M’i kanë dërrmuar djemtë, nuk kam pasur çfarë të shti në tokë”, u shpreh ajo.
Ajo bashkë me familjarë të tjerë, të hënën ishin prezent në seancën e apelit ndaj të akuzuarit Millosh Pleskoviq.
Aty u shqyrtua ankesa e mbrojtjes ndaj vendimit të shkallës së parë të gjyqësorit, që Pleskoviq e dënoi me 15 vite burgim.
“Hetimet e prokurorisë ishin tendencioze. Milloshi atëherë i ka pasur 19 vjet, në momentin kur ka ndodhur kjo ka qenë në mbajtje të dënimit, nuk ka qenë as zyrtar i policisë. Për më tepër, nuk është arritur të identifikohet saktë vendi i ngjarjes. Dëshmitarët kanë përmendur vend tjetër, aktakuza vend tjetër dhe vendimi i Gjykatës vend tjetër të kryerjes së veprës penale”, tha avokatja e Pleskoviq.
Fjalët e avokates ku paraqiste ankesat e saj në lidhje me procesin gjyqësor dhe përmbajtjen e aktgjykimit, nuk u pritën mirë nga të dëmtuarit.
Një përmbledhje të ankesës së mbrojtjes së të akuzuarit e bëri edhe gjykata, ku mbrojtja pretendonte shkelje të shumëfishta përgjatë procesit gjyqësor.
“Mungesës së arsyetimit të aktgjykimit, shkeljes së mbrojtjes përgjatë marrjes në pyetje të dëshmitarëve, konkretisht kufizimit të marrjes në pyetje të dëshmitarëve Isa Berisha, Xhenger Cana, si dhe parandalimi i marrjes në pyetje efektive të dëshmitarit anonim F1”, u shpreh gjykatësja Albina Shabani – Rama.
Dy fjalë para kolegjit të gjykatësve i pati edhe Mihrije Daçaj.
“M’i kanë vra dy djemë bineq. 24 vjet i kanë pasë. Edhe unë kum shkru përjetë burg, se m’i ka mbyt dy djemtë”, tha Mihrije Daçaj, nëna e binjakëve të vrarë.
Edhe nga përfaqësuesi i palëve të dëmtuara u kërkua që dënimi ndaj Pleskoviq të ashpërsohet.
“Ne konsiderojmë se dënimi i shqiptuar nga Gjykata e Shkallës së Parë, një dënim prej 15 vitesh është i vogël”, tha Gent Gjini, avokat i pales së dëmtuar.
Për vrasjen e tre civilëve shqiptarë dhe plagosjen e disa të tjerëve gjatë luftës në Kosovë, Millosh Pleskoviq u dënua me 15 vjet burgim në korrik të vitit të kaluar.
Dënimi prej 15 vitesh burgim, është dënimi maksimal i cili shqiptohet nga Gjykatat për krimet e luftës të kryera gjatë periudhës 1998 – 1999. Kjo për shkak se në raste të tilla, merret parasysh Kodi Penal i ish-Jugosllaivsë, periudhë në të cilën është kryer vepra penale.
