Ish-anëtari i partisë GUXO, Burim Meta, ka kritikuar këtë subjekt për mungesë guximi që të garojë i vetëm në zgjedhjet e 28 dhjetorit.
Ai ka thënë se nëse kjo parti vazhdon të mburret me votat e vitit 2021, atëherë duhet ta dëshmojë peshën e saj reale pa u mbështetur te Lëvizja Vetëvendosje.
“Ju ‘pseudoGUXO-ista’, që në zgjedhjet e fundit u krekosët me numrat e votave sikur ishin medalje olimpike, a mos vallë këtë herë do të dilni më në fund të vetëm në garë, për të provuar se ato vota ishin vërtet tuajat? Keni mjaftueshëm mandate për ta futur GUXOn në parlament, por gjithmonë duket sikur ju mungon guximi për ta bërë hapin e vetëdijshëm”, ka shkruar Meta.
Ai ka akuzuar GUXO-n se po i ndihmon Albin Kurtit të sigurojë përqindjen e votave që dëshiron.
“A mund t’i bëni thirrje moralit dhe ndërgjegjes suaj, nëse vërtet besoni në vetvete, e të provoni të krijoni sinergjinë e vitit 2021? Pse nuk e provoni ta rikrijoni atë pa u fshehur pas krahëve të Albinit, e t’i ndihmoni atij që të marrë përqindjen e dëshiruar? Apo, si gjithmonë, do të zgjidhni lojën e kameleonizmit – duke ndryshuar ngjyrë sipas rrethanës, pa identitet tuajin, pa guxim të vërtetë?”, ka shkruar Meta.
