Ish-presidenti i Shqipërisë, Ilir Meta e ka përgëzuar kryeministrin e vendit, Albin Kurti, për takimin e djeshëm në Bruksel, me presidentin serb, Aleksandar Vuçiq.
Meta ka thënë se Kurti ka shkuar atje i përgatitur dhe konstruktiv, përcjell teve1.info
“Mbrëmë në Bruksel ishte një mundësi e mirë për të hedhur një hap të qëndrueshëm e pozitiv drejt njohjes së ndërsjelltë, paqes dhe integrimit europian të Kosovës dhe Serbisë. Teksti zyrtar i marrëveshjes pati elemente që meritojnë vlerësim pozitiv, përderisa palët zotohen që të udhëhiqen nga synimet e parimet e përcaktuara në Kartën e Kombeve të Bashkuara, sidomos ato për barazinë sovrane të Shteteve, respektimin e Pavarësisë, autonomisë dhe integritetit territorial të tyre, si dhe të Drejtën për Vetëvendosje. E përgëzoj kryeministrin e Kosovës, z. Kurti, që kishte shkuar i përgatitur dhe konstruktiv”, ka shkruar ai në Facebook.
Lideri i Partisë së Lirisë shpreson se edhe Vuçiqi ta gjejë guximin e të nënshkruajë marrëveshjen sa më shpejt, sepse siç thotë ai, koha kurrë nuk mund të kthehet pas.
“E ardhmja e rajonit tonë nuk është te skemat dhe taktikat si puna e ‘Ballkanit të Hapur’, as te ‘tërheqjet e veshëve’ por te marrëveshjet e drejta, transparente, që konkretizojnë integrimin europian dhe i hapin rrugën fqinjësisë së mirë, ku asnjë fqinj nuk e dominon tjetrin”, ka shtuar Meta. /Teve1.info/
