Meta Platforms dhe Microsoft kanë njoftuar reduktime të stafit dhe masa ri-strukturimi, derisa këto kompani të mëdha të teknologjisë vazhdojnë të përshtatin operacionet për shkak të rritjes së investimeve në inteligjencë artificiale.
Sipas raportit nga Bloomberg, Meta Platforms planifikon të shkurtojë rreth 10 për qind të fuqisë së saj punëtore ose afër 8 mijë punonjës, ndërsa gjithashtu do të mbyllë rreth 6 mijë pozicione të hapura.
Kompania në një njoftim për punonjësit tha se pushimet nga puna do të ndodhin më 20 maj, teksa synon të përmirësojë efikasitetin dhe të kompensojë investimet në inteligjencë artificiale, përfshirë modelet e mëdha gjuhësore dhe chatbot-et.
Shefi ekzekutiv i kompanisë Meta, Mark Zuckerberg, ka rritur shpenzimet për infrastrukturën e inteligjencës artificiale dhe partneritetet, me kompaninë që parashikon shpenzime kapitale rekord këtë vit.
Meta tha se punonjësit e prekur do të marrin paketa kompensimi dhe shërbime mbështetëse.
Ndërkohë, sipas CNBC-së, Microsoft tha se do të ofrojë programe largimi vullnetar për deri në 7 për qind të fuqisë së saj punëtore në SHBA.
Programi do të zbatohet për punonjësit në nivelin e drejtorëve të lartë dhe më poshtë, të cilët plotësojnë kriteret e moshës dhe viteve të shërbimit.
Microsoft tha se kjo lëvizje është pjesë e përpjekjeve për t’u përshtatur me ndryshimet e nxitura nga inteligjenca artificiale dhe për të rregulluar sistemet e brendshme të kompensimit dhe vlerësimit.
Kompania ka rritur investimet në qendrat e të dhënave për të mbështetur shërbimet e inteligjencës artificiale, krahas firmave të tjera të mëdha të teknologjisë.
