Meta beson se institucionet e Kosovës do t’i zbardhin shpejt për siç thotë ai këto akte “burracake” dhe t’i vë para drejtësisë autorët.
“Dënoj me ashpërsi sulmin e dhunshëm dhe me armë ndaj autoriteteve policore të Kosovës, në Zubin Potok. Kam besim të plotë se institucionet ligjzbatuese të Republikës së Kosovës do t’i zbardhin shumë shpejt këto akte burracake dhe do të vënë para drejtësisë autorët”, ka shkruar ai në një postim në Facebook.
Ai ka bërë thirrje që të shmanget çdo provokim dhe përshkallëzim i tensioneve.
“Bëj thirrje për shmangien e çdo provokimi dhe përshkallëzimi të tensioneve, që minojnë sigurinë e Kosovës, paqen dhe stabilitetin në rajon”, ka thënë më tej Meta.
Ndryshe, sot ministri i Punëve të Brendshme në Kosovë, Xhelal Sveçla, tha se sulmi ndaj policëve “tashmë i faktuar, me granatë dore dhe AK-47, si një akt terrorist, është bërë me qëllim të frikësimit të zyrtarëve policorë, por edhe të të gjithë qytetarëve të Kosovës”.
Ai ka thënë se “grupe të ndryshme në tri ditët e fundit kanë realizuar katër sulme në atë zonë”.
Po ashtu edhe kryeministri, Albin Kurti tha se sulmet ndaj policisë për tre ditë rresht vijnë nga ana e territorit serb.
“Për tri ditë radhazi (13–15 prill) policët e Kosovës janë sulmuar në pikën kufitare me Serbinë. Dje dhe sot herët, një breshër plumbash dhe një granatë dore u hodhën drejt policisë sonë. Burimet tona e kanë identifikuar sulmin e djeshëm si të ardhur nga Serbia”, ka shkruar Kurti.
Për këtë sulm ka reaguar edhe Bashkimi Evropian dhe Ambasada e SHBA-së në Kosovë, të cilët dënuan dhunën ndaj policëve në veri. /teve1.info/
