Nxënësit e klasës së parë në shkollën “Ismaili Qemali” në Mitrovicë tash e tre javë janë duke mësuar pa mësuesen e tyre.
Kjo pasi e njëjta është në pushim të lehonisë.
Kësisoj të njëjtit janë shpërndarë në dy paralele të tjera. Prandaj në dy klasë të para, që nga data 12 mars janë duke mësuar rreth 40 nxënës.
E kjo ua ka vështirësuar punën edhe mësimdhënësve të këtyre klasave.
“Besoj që brenda këtyre ditëve një mësuese vjen. Nxënësit nuk kanë hupur me përjashtim të dy ditëve që prindërit i kanë bojkotuar si kanë pru fëmijët, nuk kanë hup mësim pasi i kemi nda në dy paralele të tjera edhe pse ato dy mësuese janë ngarkua edhe tjetra është që kanë me punuar me numër më të madh të nxënësve dhe në të vërtetë është vështirësi”, ka deklaruar drejtori i shkollës, Mustaf Kajtazi.
Por sipas drejtorit të kësaj shkolle, konkursi është hapur, mirëpo është në fazën ankimore.
“Me 12 e kemi dërguar kërkesën me plotësu vendin e punës. Drejtoria e Arsimit na ka pranuar në menynë zyrtare, megjithatë që duhet edhe menjëherë e kanë shpall konkursin, konkurs kanë aplikuar, punëtor janë pranuar. Mirëpo zyra e personelit dhe burimeve njerëzore i kanë rregullat e veta të cilat duhet me verifiku ato që janë hi në komision edhe është paraqitur një ankesë dhe ajo ankesë e shtynë për 8 ditë”.
E sipas prindit, Baki Hajrizi ky lloj i mësimit nuk po është i efektshëm për nxënësit të cilit vetëm sa kanë filluar hapat e parë në nxënien e dijes.
“Bashkimi i nxënësve në dy klasa, 1/3 me ½ dhe 1/ 3 me 1/1 është bajagi sfiduese. Një mësuese mëson me 42 deri me 45 nxënës dhe po shohim që mësimi është tepër vështirë të mbahet. Po ka interesim por ajo zhurma e madhe prej nxënësve po bën të pamundshme kuptimin e ligjëratës që po bën mësuesja”, tha ai.
Televizioni ka provuar të marrë një qëndrim nga drejtoresha e arsimit në komunën e Mitrovicës, Drita Kadriu, por e njëjta nuk ka qenë e qasshme.
