Ditëlindjen e 73-të e festoi me nipa e mbesa. Por një datë tjetër të lindjes, Maliq Luzha nga Ferizaj, nuk do ta harrojë kurrë.
Ishte 24 marsi i vitit 1989, kur mësuesi, po kthehej në shtëpi nga demonstratat gjithëpopullore në Ferizaj.
Por, atij rrugën ia prenë 10 policë serbë.
Kjo pasi ky kishte rënë në sy të organeve serbe, shkak angazhimi në veprimtari të ndryshme kombëtare.
“Janë turrë ashtu si pernjehere, unë s’kam tentue me ikë, nuk e ndijsha veten fajtor…Incizimin e e ka ba një austriak, aty nuk është ajo pjesa sa kanë sjellë ata…”, thotë Maliq Luzha, ish-mësues nga Ferizaj.
Luzha tani 76 vjeçar, e duroi torturën fizike e pa mëshirë të forcave serbe. Por një gjë tjetër, ky nuk arriti ta duronte.
“Mu kanë dokë si kudra, i nxjerri dhomt e ma shajti nanën shqiptare, aty s’mujta mu duru….”, shtoi ai.
Pas kësaj ngjarje, ai u dërgua në stacionin policor në Ferizaj. Por, aty thotë se nuk u maltretua më.
“Na kanë qu në sallën e pritjes në katin e dytë, na kanë rujt me armë e kshtu, në natën e dytë apo të tretën me kanë marrë në pyetje, po fati që një inspektor I njohur ka intervenu…”, thotë ai.
Nga rrahja që ia bën 10 policët serbë, ish-mësuesi mori lëndime të shumta.
“Kam pas tri bri të thyme, një e kam pas të kputur krejt, edhe sot kam pasoja…”, thotë Luzha.
Por, tani kur kanë kaluar mbi 3 dekada nga kjo ngjarje, a pendohet Maliq Luzha, që ua ktheu grushtet policëve serbë?
“Jo, kam mujt me ju shmang, po nuk e kam ditë cka ndodh. I penduar s’jam..”, shtoi ai.
Para se të ndodhte ky rast, Luzha ishte paralajmëruar disa herë të mos dilte nga shtëpia.
Ndërsa shkaku i qëndrimeve kombëtare, sistemi jugosllav Maliq Luzhën e suspendoi edhe nga puna si mësimdhënës.
Kronika e realizuar nga gazetari Fidan Zejnullahu.
