Njëri nga shkaktarët e problemeve të funksionimit të faqes së Komisionit Qendror të Zgjedheve rezulton të jetë edhe një virus rus.
Kështu janë të gjeturat e një raporti mbi mosfunksionalitetin e faqes nga profesori i sigurisë kibernetike, Blerim Rexha.
Sipas tij, nga ky virus ka mundur të merren të dhëna personale që vizitorët e faqes së KQZ-së, i kanë pasur në kompjuterët e tyre.
“Për virusin malware ‘Lumma Stealer’, që është një virus me prejardhje ruse… …Së paku tre ditë ka qenë aty dhe ne besojmë se shumë qytetarë që kanë vizituar faqen kanë mundur të jenë infektuar, sidomos ata që kanë vizituar faqen përmes kompjuterëve të vet, ose sistemit operativ Windoës, ku virusi është fshehur dhe maskuar si një catchin për të mbrojtur kinse autentikimin, dhe ka kërkuar disa veprime nga vizitorët dhe nëse këta vizitorë që kanë vizituar faqen e KQZ-së, kanë ndjekur këto rregulla të virusit ata kanë mundur të infektohen dhe për pasojë virusi u ka marrë shënimet që i kanë pasur në kompjuterin, gjegjësit në browser-in, ku shumica prej nesh ruajmë emrat, mbiemrat, kredit kartelat, numrat e telefonit dhe krejt shënimet tona personale që i kemi pasur në kompjuterin tonë”, tha Rexha.
Tjetër mangësi, Rexha e potencon edhe mungesën e konfigurimeve të duhura.
“Duhej të kishte disa kufizime lidhur me numrin e votuesëve, që kemi pasur raste disa herë kur bëhej shpërndarja e votave shumë të madhe tek një parti dhe tek të tjerat shumë të vogla, që ne e kemi parë si pasojë ndoshta e stresit, padijes, mostrajnimit etj. Por, edhe moskonfigurimeve jo të duhura të cloudflare, që është një masë mbrojtëse që serverëve të ASHI-së të parandalojnë, filtrojnë trafikun që ka qenë jashtëzakonisht i madh pas mbylljes së vendvotimeve”, tha ai.
Rrjedhimisht, theksohet nevoja e hetimeve për dyshimet për ndërhyrje.
“Ndërmarrja e veprimeve të nevojshme hetimore nga ana e prokurorisë për të parë nëse kemi të bëjmë me ndonjërën prej elementeve të veprave penale që ndërlidhen me të drejtën në votim, ose eventualisht veprat penale që njihen si krime kibernetike, vlerësoj se është shumë i nevojshëm”, tha avokati Ardian Bajraktari.
Si kërcënim të sigurisë, zëvendës kryeministri i Kosovës, i quajti telashet me faqen e KQZ-së.
“Ne patëm zgjedhjet javën e kaluar dhe përjetuam drejtpërdrejt këtë formë të kërcënimeve të sigurisë për sa i përket sulmeve në faqen e internetit të Komisionit Qendror të Zgjedhjeve por edhe në frekuencë shumë të sofistikuar të dhe intensive të shpërndarjes dhe prodhimit të informacioneve të rreme shumë të sofistikuar për sa i përket çështjeve dhe kohës së përzgjedhur”, tha Besnik Bislimi.
Javën e kaluar, Prokuroria e Shteti njoftoi se ka filluar me hetime, duke mos dhënë detaje të tjera.
