Njësitë mësimore të lëndës së historisë po zhvillohen në një formë të re.
Prej dy javësh, nxënësit e shkollës “Daut Bogujevci” në Fushë Kosovë po mësojnë përmes bibliotekës digjitale.
Përveç shpjegimeve të mësimit, kjo metodë përfshin edhe ushtrime me pyetje për nxënësit dhe interaktivitet brenda klasës.
Sipas arsimtarit të historisë, Vendos Krasniqi, kjo mënyrë ka shtuar interesimin e nxënësve për mësim.
“Krejt nxënësit janë aktivë dhe po ju pëlqen shumë. Suksesi është i mirë, sidomos në këtë kohë kur mungojnë disa libra. Përmes formës digjitale, nxënësit e kanë më të lehtë të kuptojnë njësinë mësimore”, deklaroi Krasniqi.
Përmes llogarive të hapura, nxënësit kanë mundësi që mësimin ta ndjekin edhe nga shtëpia, ndërsa qasje kanë edhe prindërit, të cilët mund të shohin arritjet dhe sukseset e fëmijëve në çdo lëndë.
Kjo formë e të mësuarit po u pëlqen edhe vetë nxënësve.
“Forma e mësimit digjital na ka mësuar shumë, si për zhvillimin e njohurive tona ashtu edhe për zhvillimin e teknologjisë. Gjithashtu, na ndihmon të përforcojmë njohuritë që ta kuptojmë më mirë lëndën”, tha nxënësja Anesa Krasniqi.
“Forma digjitale ta tregon se si duhet të duket tema dhe gjithçka tjetër. Mua më pëlqen shumë”, tha Amar Haxhiaj.
“Forma digjitale më duket shumë e mirë. Arsimtarit i lehtësohet shpjegimi i lëndës, kurse ne kemi mundësi të bëjmë pyetje në fund për të parë sa mirë e kemi kuptuar mësimin”, tha nxënësi tjetër Erdi Sopjani.
Detaje për këtë projekt pilot dha edhe sekretari i shkollës “Daut Bogujevci”.
“Fillimisht kemi bërë kërkesë në DKA që të realizohet ky projekt pilot, pasi kemi parë rënie të numrit të nxënësve. Kjo formë është më atraktive sepse mësimi zhvillohet në mënyrë vizuale dhe përfshihen disa fusha njëkohësisht. Për shembull, në historinë përfshihen edhe gjeografia e arti”, tha sekretari Betim Ahmeti.
Ky projekt pilot po zbatohet për herë të parë në Fushë Kosovë, me mbështetjen e Drejtorisë së Arsimit.
