Në prag të zgjedhjeve lokale, në fushatë elektorale iu adresua komunitetit serb.
Në cilësinë e kryeministrit në detyrë, Albin Kurti, dha mesazhe në drejtim të serbëve të Kosovës derisa akuzoi Listën Serbe dhe Beogradin për manipulim të opinionit publik dhe përhapje të lajemeve të rreme.
Kurti, përmes këtij adresimi tha që nuk është kundër asnjë komuniteti etnik, pikërisht për këtë tha që nuk mund ta pranoj që një parti politike të marrë monopolin e serbëve të Kosovës.
“Fatkeqësisht Lista Serbe në Kosovë insiston se vetëm ajo mund ta përcaktojë rëndësinë dhe kuptimin e identitetit serb, se vetëm ata kanë kompetencë të vendosin kush është serb e kush jo, kush është serb i vërtetë e kush i rremë…. Në këto zgjedhje nuk votohet për çlirim siç deklaron Lista Serbe. Çlirimi ka ndodhur në muajin qershor 1999 kur u tërhoqën nga territori i Kosovës ushtria, policia dhe forcat e tjera të Serbisë”, deklaroi ai.
Përmes kësaj, po vlerësohet se qeveria në detyrë po sqaron veprimet e saja ndaj grupeve që qëllim kanë destabilizimin e vendit.
“Si një shpjegim, si një sqarim për ata të cilët thjesht po e keqkuptojnë ose po e interpretojnë me qëllim keq, në dobi të qarqeve të caktuara, për arsye të caktuara të tyre që janë të njohura pothuajse. Sepse ka lobim joparimor, në forma të ndryshme të stimulimit të propagandës kundër Kosovës dhe institucioneve të saja”, deklaroi profesori Mazllum Baraliu.
Mirëpo, meqenëse jemi në fushatë elektorale, një adresim i tillë në cilësinë e kryeministrit në detyrë, shihet si jo korrekte nga profesori universitar Avdi Smajalj, meqë vlerësohet si tentativë për orientim të votave.
Kurti mes tjerash tha se pret bashkëpunim me komunitetin serb në qeverisjen e re të tij, për një sistem arsimor dhe shëndetësor të unifikuar.
