Ambasadori i Mbretërisë së Bashkuar në Kosovë, Jonathan Hargreaves, ka njoftuar se të martën është takuar me presidenten Vjosa Osmani, me të cilën ka diskutuar situatën politike në vend.
Përmes një njoftimi, Hargreaves ka theksuar se bashkë me Osmanin janë pajtuar se ngërçi i vazhdueshëm politik po rëndon Kosovën dhe qytetarët e saj.
“E urova presidenten Osmani për përpjekjet e saj për të dalë nga kriza në përputhje me Kushtetutën e Kosovës, dhe theksova përgjegjësinë që kanë të gjitha partitë politike për të vendosur interesin e shtetit para atij partiak, si dhe për të gjetur një zgjidhje”, ka shkruar ambasadori britanik.
Takimi vjen në një kohë kur vendi po përballet me tensione politike të brendshme dhe mungesë konsensusi për tejkalimin e krizës aktuale.
