Lidhjet diplomatike mes Kosovës dhe Britanisë së Madhe vazhdojnë të jenë të forta.
Këtë e dëshmon edhe vizita sekretarit të Jashtëm të Mbretërisë së Bashkuar, David Lammy, në Prishtinë.
Diplomati britanik të mërkurën u prit në presidencë nga e para e shtetit, Vjosa Osmani.
Në konferencën e përbashkët për media, Osmani u shpreh falënderuese për mbështetjen e vazhdueshme të Britanisë ndërsa propozoi edhe marrëveshje për mbrojtje dhe ekonomi mes të dyja vendeve.
“Lidhja e marrëveshjes për bashkëpunim strategjik mes dy vendeve që në veçanti do të mbulojë fushën e mbrojtjes dhe të ekonomisë. Pra, sot kemi diskutuar për thellim të bashkëpunimit strategjik në këto fusha që do të vazhdojnë më pas me ekipet tona. Jemi të përkushtuar të konkretizojmë këtë marrëveshje. Ka hapësirë për fuqizim të mëtejshëm të aleancës dhe të prezencës së Mbretërisë së Bashkuar në Kosovë” , tha Osmani.
Në anën tjetër, kryediplomati britanik, David Lammy, bëri të ditur se Britania do të vazhdojë ta mbështes Kosovën, deri sa kërkoi më shumë angazhim për normalizim e marrëdhënieve me shtetin fqinj Serbinë.
“Janë disa gjëra që duam t’i shohim. Normalizim të qëndrueshëm mes Kosovës dhe Serbisë. Britania padyshim është kontribuuese e madhe në KFOR. E kam vizituar KFOR-in herën e fundit që isha këtu dhe do ta vizitojë prapë. Shpresoj që qeveria e ardhshme i adreson nevojat e gjithë qytetarëve, përfshirë progresin në integrimin e serbëve në Kosovë dhe angazhimin e fuqishëm në dialogun e udhëhequr nga BE-ja”, u shpreh sekretari britanik.
Pas qëndrimit në Kosovë, sekretari i jashtëm britanik do të udhëtojë për në Beograd ku do të zhvilloj takime me krerët shtetëror të Serbisë.
Mbretëria e Bashkuar do të jetë mikpritëse e një takimi të udhëheqësve të Ballkanit Perëndimor në kuadër të Samitit të Procesit të Berlinit.
