Që nga sulmi terrorist në Banjskë, që besohet të jetë mbështetur nga Serbia, zyrtarë vendorë, por edhe ata ndërkombëtar kanë tërhequr vërejtjen se raste të tilla mund të përsëriten.
Një paralajmërim tejet serioz ka dhënë të enjten edhe kryeministri Albin Kurti i cili u bëri thirrje serbëve që jetojnë në Kosovë të mos bien pre e provokimeve të grupeve që kanë qëllim destabilizimin.
Njohësi i çështjeve politike, Shkëlzen Maliqi, thotë se këto mesazhe të Kurtit janë të drejta dhe sipas tij, grupet terroriste serbe përveç Beogradit mund të përkrahen edhe nga vendet e tjera.
“Është një them ashtu një apel ose një adresim që duhet të merret seriozisht … Pas Banjskës neve e dimë se ka grupe terroriste jo vetëm që i ndërsyen Beogradi, por ndoshta edhe Rusia ose ndonjë faktor tjetër që nuk i konvenon pavarësia e Kosovës … ka sinjale tash që ajo zonë e kufirit po kontrollohet pak më ose vëzhgohet nga KFOR-i, Eulex-i e kështu ndoshta provojnë edhe me bo incidente tjera edhe në brendi të Kosovës”, ka thënë Maliqi
Ndërsa, profesori universitar Milazim Krasniqi thotë se adresimi i Kurtit në raport me serbët duhet të shndërrohet në strategji, pasi sipas tij, instrumentalizomi i serbëve të Kosovës është një politikë e vjetër e Beogradit.
“Mesazhi në fakt është i drejtë dhe duhet të përsëritet vazhdimisht dhe duhet të shndërrohet në një projekt të politikave shtetërore, për të gjet forma për t’i shkëputur serbët e Kosovës nga diktati i qeverisë së Serbisë. Për ndryshe qeveria Serbe së paktën nga fillimi i shekullit 20-t e këndej e ka një politikë të instrumentalizimit të serbëve të Kosovës, të sponzorizimit të terrorizmit në Kosovë dhe të fajësimit të shqiptarëve. Kështu që mbi këtë konstantë kanë qenë edhe aksionet e fundit terroriste në Banjskë”, ka thënë Krasniqi.
Pikërisht për shkak të rrezikut nga përshkallëzimi i situatës së sigurisë në pjesën veriore, NATO ka rritur numrin e trupave të KFOR-it në Kosovë.
