Autori: Adea Mustafaj
Për 18-vjetorin e shpalljes së Pavarësisë së Kosovës, urimet filluan që nga e hëna.
Ndër të parët urimet erdhen nga Presidenti i Shteteve të Bashkuara të Amerikës, Donald Trump.
Në letrën e tij drejtuar Presidentes së Kosovës, Vjosa Osmani, pos urimeve ai rikonfirmoi mbështetjen e palëkundur të SHBA-së për sovranitetin dhe integritetin territorial të Republikës së Kosovës.
“Shtetet e Bashkuara mbeten të palëkundura në mbështetjen e tyre për sovranitetin dhe integritetin territorial të Kosovës. Ndërsa marrëdhënia midis vendeve tona vazhdon të forcohet, ne presim me padurim të zgjeronim partneritetin tonë, përfshirë përmes rritjes së tregtisë dhe investimeve që çojnë përpara prosperitetin e përbashkët. Shtetet e Bashkuara janë të gatshme të punojnë krah Kosovës për të avancuar paqen dhe stabilitetin për përfitim të ndërsjellë.”, ka shkruar Trump.
Përveç Trump, të hënën Osmani ka pranuar mesazhe urimi edhe nga Mbreti i Mbretërisë së Bashkuar, L.T. Charles III, Presidenti i Republikës Federale të Gjermanisë, Frank-Walter Steinmeier, Presidenti i Republikës Franceze, Emmanuel Macron dhe Presidenti i Republikës Italiane, Sergio Mattarella.
Në mesazhet e tyre, liderët shprehën urimet më të përzemërta për Presidenten dhe qytetarët e Kosovës.
Po ashtu theksuan përkushtimin për forcimin e marrëdhënieve dypalëshe, mbështetjen për integrimin euroatlantik të vendit, si dhe për paqen, stabilitetin dhe prosperitetin në rajon.
Ndërkohë ambasadori i Mbretërisë së Bashkuar në Kosovë, Jonathan Hargreaves në urimin e tij për Kosovës, përmendi ish-kryeministrin e vendit, Hashim Thaçi, i cili e kishte shpallur pavarësinë.
“Dy ditë pasi Kryeministri Hashim Thaçi bëri deklaratën e tij të famshme në këtë ndërtesë, Sekretari i Jashtëm britanik iu drejtua Parlamentit të Mbretërisë së Bashkuar me fjalë që ende kumbojnë, duke thënë: ‘Pavarësia e Kosovës do të jetë vetëm fillimi i një rrugëtimi sfidues përpara, për të ndërtuar një vend të qëndrueshëm, të qëndrueshëm në zhvillim, shumetnik dhe demokratik’”, ka shkruar Hargreaves.
Presidenti i Italisë, Sergio Matarella, në urimin e tij tha se Roma mbetet e palëkundur në mbështetjen e rrugëtimit të integrimit evropian të Prishtinës.
“Roma mbetet e palëkundur në mbështetjen e rrugëtimit të integrimit evropian të Prishtinës dhe të mbarë rajonit. Arritja e këtij objektivi, për të cilin Italia do të vazhdojë të kontribuojë, mbetet thelbësore dhe kërkon një shtytës të re për procesin e normalizimit të marrëdhënieve me Beogradin”, ka thënë Matarella.
Ndërsa Ambasada e Gjermanisë në Kosovë u shprehen se mbetet krenare për partneritetin e fortë me Kosovën.
“Nga Gjermania në Prishtinë dhe nga Kosova në Berlin, ne nderojmë një miqësi të ndërtuar mbi demokracinë, lirinë dhe respektin e ndërsjellë. Si një nga vendet e para që njohu pavarësinë e Kosovës në vitin 2008, Gjermania mbetet krenare për një partneritet të fortë dhe afatgjatë — të ndërtuar shumë kohë para pavarësisë dhe të forcuar çdo ditë që prej atëherë. Gati 600,000 kosovarë që jetojnë në Gjermani e mbajnë të gjallë dhe të fuqishme lidhjen mes vendeve tona, duke pasuruar të dyja shoqëritë dhe duke thelluar të ardhmen tonë të përbashkët. Në moshën tetëmbëdhjetëvjeçare, Kosova është një histori e vërtetë suksesi. Le të vazhdojmë së bashku të shkruajmë kapitullin e radhës të një të ardhmeje të ndritur dhe të përbashkët”, ka thënë Ambasadore gjerman në Kosovë.
Gjatë ditës urimet vijuan edhe nga Ministria e Jashtme e Turqisë, Qeveria e Republikës Islamike e Pakistanit, Ambasada e Austrisë në Prishtinë, President i Izraelit dhe shumë vende të tjera.
