Qindra qytetarë morën pjesë në faljen e namazit të Bajramit në këtë xhami.
Nga aty myftiu Naim Tërnava foli për rëndësinë dhe origjinën e festës kurse kryemami i Prizrenit, Orhan Bislimaj i cili mbajti ligjëratën dha mesazhe për ndaljen e urrejtjes mes besimtarëve.
“Si vëllezër që jemi nuk duhet të lejojmë urrejtjen brenda nesh për çfarëdo arsye. Dashuria jonë në emër të Zotit duhet ta luftojë çdo përçarje që mund të lind për shkak të interesave të dynjasë apo pikëpamjeve tjera shoqërore, partiake e politike”,tha ai.
Kurse Myftiu i Kosovës, Naim Tërnava foli për origjinën e therjes së kurbanit, veprim ky i cili e karakterizon këtë festë.
“Këtë festë të Kurban Bajramit e karakterizon edhe vet prerja kurbanit në shenjë rikujtimi të sakrificës së pejgamberit Ibrahim a.s. me të birin Ismailin, i cili ishte i gatshëm që për Zotin të flijonte edhe të birin e tij dhe Kurban Bajrami na vjen si një rikthim dhe rikujtim i vlerave burimore që posedon feja jonë. Na rikujton sakrificën, solidaritetin, ndihmën e humanitetin ndaj njerëzve që kanë nevojë”,tha Myftiu Tërnava.
Tërnava porositi të shtohet bashkëpunimi e sjelljet e mira, kurse të ndalen luftërat e gjakderdhjet.
Pas përfundimit të namazit, besimtarët ia shtrënguan dorën njëri-tjetrit për t’ia uruar festën.
Në mesin e xhematlinjve kishte edhe kosovarë që jetojnë në diasporë.
Kurban Bajrami shënon edhe fundin e Haxhit, në të cilin besimtarët që kanë mundësi financiare vizitojnë vendet e shenjta për të përmbushur kushtin e pestë të islamit.
Këtë vit haxhin e kryen 741 besimtarë muslimanë nga Kosova.
Kronika e realizuar nga Gojart Jashari
