Sipas njoftimit të Gjykatës, të dyshuarve u është caktuar masa e arrestit shtëpiak për një muaj, shkruan teve1.info
“Gjykata Themelore në Prishtinë, Departamenti Special ka vendosur lidhur me kërkesën e Prokurorisë Speciale të Republikës së Kosovës, për caktimin e masës së paraburgimit kundër të pandehurve A.K, B.H, B.P, B.S, D.Z, F.H, I.I, I.S, N.S, R.K, S.K, S.P, SH.A dhe Z.P, për shkak të dyshimit të bazuar se kanë kryer veprën penale në vazhdimësi Keqpërdorimi i pozitës apo autoritetit zyrtar nga neni 414 i KPRK-së në bashkim me veprën penale Marrja e ryshfetit nga neni 421 të Kodit Penal të Republikës së Kosovës. Gjyqtari i procedurës paraprake kërkesën e prokurorit të shtetit për caktimin e masës së paraburgimit kundër të pandehurve A.K, B.H, B.P, B.S, D.Z, F.H, I.I, I.S, N.S, R.K, S.K, S.P, SH.A dhe Z.P e ka refuzuar dhe të njëjtëve ju ka caktuar masën e arrestit shtëpiak në kohëzgjatje prej një (1) muaji për secilin veç e veç. Të pandehurve iu është masa e arrestit shtëpiak në bazë të nenit 183 lidhur me nenin 187 par.1 nën paragrafi 1.2.1, 1.2.2 dhe 1.2.3 të KPPK”, thuhet në njoftim.
Në aksionin e djeshëm të IPK-së dhe Prokurorisë janë arrestuar 26 zyrtarë policorë, përfshirë këtu dy rreshterë policorë, të dyshuar për marrje ryshfeti. /Teve1.info/
