Gjykimi në rastin e ish-politikanit serb Oliver Ivanoviq ka marrë epilog 6 vite pas vrasjes së tij para zyrës së partisë në Mitrovicë të Veriut.
Të akuzuarit Nedelko Spasojeviq, Marko Roshiq, Dragisha Markoviq dhe Zharko Jovanoviq, u dënuan për pjesëmarrje në grup të organizuar kriminal që organizoi vrasjen e Ivanoviqit dhe për keqpërdorim të detyrës zyrtare.
Ndërsa, Silvana Arsoviq u lirua nga akuzat. Kurse ndaj Rade Basara, gjykata shqiptoi aktgjykim refuzues, pasi në seancën e kaluar prokuroria u tërhoq nga ndjekja penale në mungesë të provave.
Përveç dënimit me burgim, ndaj 3 të dënuarve u shqiptua edhe dënimi me gjobë, në total 16 mijë euro.
Megjithatë, asnjë nga të akuzuarit në këtë rast nuk ishte i pranishëm në gjykatore.
“Fakti që është dënuar për keqpërdorim të pozitës zyrtare është bërë pa prova që ta vërtetojnë. Do të përpiqemi ta kundërshtojmë vendimin në Gjykatën e Apelit, ku jam i sigurte se Dragisha do të shpallet i pafajshëm”, tha avokati Dejan Vasiq.
Sipas Prokurorisë, motivi i vrasjes ka qenë shtrirja e kontrollit në pjesën veriore të Mitrovicës si në jetën politike ashtu edhe ekonomike, dhe veprimtarisë së përgjithshme të aktivitetit kriminal, derisa ka pretenduar se grupi ishte i udhëhequr nga Zvonko Veselinoviq dhe Milan Radoiçiq.
