Njësia për Komunikacionin Rrugor nga Drejtoria Rajonale e Policisë në Gjilan ka ndaluar një automjet me targa ZH (Zvicër) në rrugën nacionale Gjilan–Kamenicë, për tejkalim të shpejtësisë së lejuar.
Sipas njoftimit të Policisë së Kosovës, automjeti ishte duke lëvizur me 113 km/h në një zonë ku kufizimi i shpejtësisë është i përcaktuar me 60 km/h, duke rrezikuar sigurinë në trafik.
Drejtuesi i automjetit, i cili posedon patentë shoferi të lëshuar nga autoritetet zvicerane, është ndëshkuar me gjobë prej 300 euro, si dhe ndaj tij është vendosur masa mbrojtëse e ndalimit të drejtimit të mjeteve motorike në territorin e Kosovës për një periudhë prej tre muajsh.
Policia ka bërë të ditur se, duke u bazuar në marrëveshjen për bashkëpunim ndërmjet Republikës së Kosovës dhe Zvicrës, për trajtimin e kundërvajtjeve të kryera nga shtetasit përkatës, gjoba e shqiptuar do t’i përcillet autoriteteve kompetente në Zvicër për informim dhe veprim sipas rregullave të përcaktuara në këtë marrëveshje.
Policia e Kosovës u bën thirrje të gjithë pjesëmarrësve në trafik, veçanërisht drejtuesve të automjeteve, që të respektojnë shenjat dhe kufizimet e shpejtësisë, për të shmangur aksidente dhe pasoja të rënda në komunikacion.
