Javën e nisi në Gjykatën Themelore në Prishtinë.
Ministri në detyrë i Bujqësisë, Faton Peci, u përball me mërgimtarin Blerim Avdiu, i cili e kishte kanosur atë përmes rrjeteve sociale.
“Duke i dërguar mesazh me fjalë fyese dhe kanosëse si, kryekriminel, t’i ** edhe ata të vdekurit, unë kam me t’vra, jo tjetër kush. Kryekriminel, ti gjallë e unë gjallë, nuk kemi me jetu. Po të them që qat ditë që të vij në KS, asnjani nuk kena me kon në këtë jetë.O bir shkine, o bir shkau”, tha prokurori Besart Mustafa
Pasi dëgjoi aktakuzën, Blerim Avdiu e pranoi fajësinë.
“Unë e pranoj fajin. Faji është i imi. Me t’thanë të drejtën ministrin Peci, as që e kam njohur najherë, as që e kam pa najherë”, u shpreh i akuzuari.
Veprimet e tij i arsyetoi duke thënë se ishte i dehur dhe i papunë.
“Jam kon i pitë me t’tregu t’drejtën, i papunë. Nuk e di as vetë se çka kom shkru. T’nesrit kom dashtë m’i kërku falje. E pashë telefonin, e kam thy. Edhe kam lyp ndihmë prej mjekëve kroatëve”, tha Avdiu.
Mirëpo ky arsyeitm, nuk e bindi ministrin në detyrë Faton Peci.
“Deklarimi që ka qenë i dehur mendoj se është i pasaktë dhe i pavërtetë. Arsyeja pse mendoj se nuk është e vërtetë, është se kërcënimi është përsëritur tri here”, u shpreh Peci.
Peci e shfrytëzoi edhe të drejtën për të kërkuar kompensim dëmi.
E veprimet e mërgimtarit Avdiu, i arsyetoi avokati i tij, Halim Shala.
“Është hera e parë që bie ndesh me ligjin. Dhe natyrshëm që nuk i ka kuptuar drejtë veprimet e tij, të cilat kanë konsumuar veprën penale”, tha avokati Shala.
Pranimi i fajësisë u aprovua nga Gjykata.
E përderisa prokuroria kërkoi që dënimi të shqiptohet në përputhje me ligjin, mbrojtja i bëri thirrje trupit gjykues që ta ketë parasysh edhe gjendjen ekonomike të të akuzuarit.
“Të mos ketë impakt që t’ia vështirësojë edhe më tutje jetën tij, të cilën veçse e ka të vështirësuar. Të kihet parasysh gjendjen shumë të dobët ekonomike”, u shpreh avokati.
Aktgjykimi për këtë rast do të shpallet të mërkurën.
