Dyert e Kuvendit të Kosovës të enjten u hapën për mërgimtarët. Këta të fundit shprehën përshtypjet e tyre, dëshirat, por edhe kërkesat që i kanë për legjislativin.
E bashkë me vajzën e tyre, Bedrije Huruglica e Ramadan Rama për herë të parë po shohin nga afër institucionin legjislativ.
Kjo në kuadër të aktivitetit tradicional “Bashkatdhetarët në Kuvend” , të organizuar nga Kuvendi i Kosovës.
E përshtypjet e mërgimtarëve për këtë vend janë pozitive.
“Përshtypje shumë e mirë. Për herë të parë kemi ardhë me vizitu kuvendin. Na vijmë nga Zvicra, jetojmë këtu në Fushë Kosovë e kemi banesën, kështu që mirë”, u shpreh Ramadan Rama, mërgimtar nga Zvicra.
Megjithatë ata kanë kërkesa për legjislativin.
“Kisha dashtë që diçka ma shumë me u bo, parqe sa ma shumë për fëmijë. Mjeksia është pak e dobët. Këtu beso që kur i kom pa çerdhet në Fushë Kosovë, dyert e hapura e fëmijët brenda, është katastrofë, shumë keq. A din, kisha bo për fëmijët shumë ma shumë”, tha Bedrije Huruglica.
Megjithatë për shkak të punimeve në sallën plenare, pritja dhe bashkëbisedimi me bashkatdhetarët po bëhet në ambiente tjera të Kuvendit.
E deputetit që po i shoqëron ata, Avni Deharit, vizita nga fëmijët po i jep një ndjesi të veçantë.
“Po kjo është një kënaqësi e veçantë se fëmijët i mbajnë në mend vizitat që i bëjnë edhe ngjarjet që i përjetojnë edhe këto kanë ndikim të madh. Mërgimtarët bëjnë shumë mirë që i marrin fëmijët me veti po edhe për neve është një gëzim i veçantë kur i shohim që vijnë”, u shpreh Dehari.
E përveç nga Zvicra, në Kuvend erdhën edhe mërgimtarë nga Gjermania e Suedia.
“Se kisha paramendua që vjen një ditë në shtet tanin, pavarësi, liri, me ardhë me vizitu. Kjo është një ndërtesë që është themeli shtëpisë, ku vendoset gjithçka, për të mirë e për të keq, e deshta me jau shpjegu fëmijëve se çka është tek është”, tha Shaqir Kosumi, mërgimtar nga Gjermania.
Ndërsa për fëmijët ardhja në kuvend ishte e këndshme.
Mërgimtarët shprehin edhe dëshirat që i kanë për pasardhësit e tyre.
Kuvendi i Kosovës do të jetë i hapur nga ora 8:00 deri në orën 16:00 edhe ditën e premte.
