Mesfushori i Dukagjinit, Mërgim Pefqeli është shpallur futbollisti më i mirë për xhiron e 12-të në Superligën e Kosovës në futboll.
Pefqeli e ka fituar epitetin e futbollistit më të mirë pasi i është ndarë çmimi “Ylli i Javës”, ka njoftuar Federata e Futbollit të Kosovës (FFK), të martën.
Komisioni i veteranëve të futbollit, ka vlerësuar Pefqelin si më të mirin duke e konstatuar dhe konfirmuar paraqitjen e tij fantastike në fitoren e Dukagjinit në udhëtim ndaj Gjilanit.
Dukagjini triumfoi 2:1, ndërsa Pefqeli krahas kontributit të madh në fushë, ai shënoi edhe golin e epërsisë për skuadrën e trajnerit Ismet Munishi.
Për Pefqelin, kjo është hera e parë këtë sezon që shpallet “Ylli i Javës” kurse pasi ka pranuar çmimin, mesfushori ka falënderuar bashkëlojtarët, stafin dhe në veçanti trajnerin Munishi duke thënë se pa këta nuk do të ishte më i miri i xhiros.
Po ashtu, Pefqeli ka thënë se Dukagjini javët e fundit ka treguar paraqitje të mira dhe shpreson të vazhdojnë me këtë ritëm pasi synimi i klubit nga Klina mbetet dalja në Evropë sezonin tjetër.
Aktualisht, Dukagjini zë vendin e shtatë në Superligë me 14 pikë të mbledhura pas 12 ndeshjeve të luajtura, ndërsa këtë vikend përballet me Feronikelin ’74 në stadiumin “18 Qershori” në Klinë.
