Senatori amerikan Bob Menendez, i cili është edhe kryetar i Komisionit të Senatit të SHBA-së për Marrëdhëniet me Jashtë, është deklaruar për takimin që ka pasur me kryeministrin e Kosovës, Albin Kurti.
Menendez përmes një postimi në Twitter, ka thënë se Kurtit i ka shprehur zotime për angazhimin e SHBA-së në sigurinë e Kosovës dhe rajonit.
“Kisha nderin të prisja kryeministrin e Kosovës, Albin Kurti. I shpreha zotimet e palëkundura për sigurinë e Kosovës dhe shqetësimet e lidhura me veprimet destabilizuese të Rusisë në Ballkanin Perëndimor. Angazhimi i SHBA-së ndaj Kosovës dhe rajonit është më vendimtar se kurrë”, ka shkruar ai.
Honored to host Prime Minister of Kosovo @albinkurti in the Capitol. Expressed my steadfast commitment to Kosovo’s security & concerns regarding Russia’s destabilizing actions in the Western Balkans. US engagement with Kosovo & the broader region is more crucial than ever. pic.twitter.com/d7BzBp7qtY
— Senate Foreign Relations Committee (@SFRCdems) May 20, 2022
Ndërkaq, nga Zyra e Kryeministrit kanë thënë tema kryesore e diskutimit mes kryeministrit Albin Kurti në takimin me senatorin amerikan Bob Menendez ka qenë rëndësia e anëtarësimit të Kosovës në NATO dhe përkushtimi afatgjatë për siguri dhe paqe i Kosovës.
“Në takim u bisedua për objektivat e përbashkëta, për ta bërë Forcën e Sigurisë së Kosovës forcë moderne, që është e gatshme për mbrojtjen e vendit dhe kontributdhënëse për paqen, sigurinë dhe stabilitetin rajonal e global. Kryeministri Kurti theksoi solidarizimin e Republikës së Kosovës me popullin e Ukrainës, duke u rreshtuar përkrah Shteteve të Bashkuara të Amerikës dhe Bashkimit Evropian në vendosjen e sanksioneve kundër Rusisë. Ai e njoftoi për ofrimin e strehimit dhe kushteve për punë për 20 gazetarë të Ukrainës dhe mundësinë që të strehojmë deri në 5.000 refugjatë”, thuhet në njoftim. /teve1.info/
Njoftimi i plotë:
Përkushtimi afatgjatë për siguri dhe paqe i Republikës së Kosovës, si dhe rëndësia e anëtarësimit të Kosovës në NATO, ishin temat kryesore në takimin ndërmjet Kryeministrit të Republikës së Kosovës, Albin Kurti me senatorin amerikan, Bob Menendez, njëherit Kryetar i Komisionit të Senatit të Shteteve të Bashkuara për Marrëdhëniet me Jashtë.
Kryeministri Kurti shprehu mirënjohjen për mbështetjen dhe përkrahjen e Shteteve të Bashkuara të Amerikës, si partner i pazëvendësueshëm i Republikës së Kosovës. Në veçanti për ndihmën me trajnime e pajisje për ndërtimin dhe zhvillimin e Forcës së Sigurisë së Kosovës. Duke i falënderuar për këtë bashkëpunim që vazhdon ende, kryeministri theksoi se Kosova e mirëpret përkrahjen e mëtejme.
Në takim u bisedua për objektivat e përbashkëta, për ta bërë Forcën e Sigurisë së Kosovës forcë moderne, që është e gatshme për mbrojtjen e vendit dhe kontributdhënëse për paqen, sigurinë dhe stabilitetin rajonal e global. Kryeministri Kurti theksoi solidarizimin e Republikës së Kosovës me popullin e Ukrainës, duke u rreshtuar përkrah Shteteve të Bashkuara të Amerikës dhe Bashkimit Evropian në vendosjen e sanksioneve kundër Rusisë. Ai e njoftoi për ofrimin e strehimit dhe kushteve për punë për 20 gazetarë të Ukrainës dhe mundësinë që të strehojmë deri në 5.000 refugjatë.
U diskutua edhe për progresin demokratik e socio-ekonomik në një vit të qeverisjes dhe punën e angazhimin e Qeverisë së Republikës së Kosovës për të fuqizuar sundimin e ligjit, për luftimin e kontrabandës, krimit dhe të korrupsionit.
